- Mühasibat uçotunun predmeti və onun obyektləri
- Təsərrüfat vəsaitlərinin və onların əmələ gəlmə mənbələrinin təsnifatı
- Mühasibat uçotunun metodu və onun əsas ünsürləri
- Mühasibat uçotunun predmeti və onun obyektləri
Azərbaycan Respublikasında bütün müəssisələr, idarələr, təşkilatlar
vahid xalq təsərrüfatı sistemini təşkil edir. Müəssisələr xalq təsərrüfatının əsas
sahələrinin tərkib hissələridir. Bütün müəssisələr öz təsərrüfat fəaliyyətinin
məzmunundan asılı olaraq sənaye, kənd təsərrüfatı, tikinti, ticarət, nəqliyyat
və s. bölünür. Həmin müəssisələr bazar iqtisadiyyatı şəraitində mövcud olan
mülkiyyət formalarından asılı olaraq: dövlət müəssisələrindən, bircə
müəssisələrdən, kiçik müəssisələrdən, səhmdar cəmiyyətlərindən, kooperativ
təşkilatlarından, fermer (kəndli) təsərrüfatlarından və s. ibarətdir. Bu
müəssisələrin hər biri bazar münasibətləri şəraitində təsərrüfat hesabı və
özünü maliyyələşdirmə Prinsipi və Respublikamızda müəssisələr haqqında mövcud
olan qanun əsasında fəaliyyət göstərir.
Təsərrüfat hesablı müəssisə o müəssisə sayılır ki, o öz xərclərini,
məhsul və ya mal satışından əldə etdiyi pul vəsaiti ilə ödəyir və mənfəət əldə
edir.
Təsərrüfat hesablı müəsisələrlə yanaşı büdcə idarələri də mövcuddur.
Bunlar öz təsərrüfat fəaliyyətləri üçün lazım olan vəsaiti dövlət büdcəsindən
alır. Büdcə idarələrinə elmi və tədris müəssisələri, tibb idarələri, mədəniyyət
idarələri və s. aiddir.
Müəssisələr dedikdə, dövlət müəssisəsi, fərdi (ailə) , şərikli payçı
(tam ortaqlı), məhdud məsuliyyətli müəssisələr və səhmdar cəmiyyətləri nəzərdə
tutulur.
Müəssisələr təsərrüfat fəaliyyətini həyata keçirmək üçün əsas fondlara
(vəsaitlərə), dövriyyə vəsaitlərinə, habelə başqa qiymətli əşyalara malik olur.
Respublikamızda mövcud olan yeni mülkiyyət formalarından asılı olaraq
müəssisələrin əmlakının əmələ gəlmə mənbələri təsisçilərin pul vəsaiti və maddi
payları, məhsulların, görülən işlərin, göstərilən xidmətlərin, qiymətli
kağızların satışından əldə olunan gəlirlər, bank kreditləri və digər kreditlər
kapital qoyuluşu üçün maliyyələşmələr və büdcədən dotasiyalar (müəssisələr xərclərini ödəmək üçün dövlət büdcəsindən
verilən yardım) və s. hesab olunur.
Müəssisənin
vəsaitləri, onların əmələ gəlmə mənbələri, hər bir müəssisədə baş verən
təsərrüfat prosesləri zamanı yaranan təsərrüfat əməliyyatları mühasibat
uçotunun obyektləri hesab olunur. Daha konkret desək mühasibat uçotunun
yeniləşdirildiyi və Beynəlxalq standartlara uyğunlaşdırıldığı şəraitdə hər bir
müəssisədə əsas vəsaitlər, qeyri-maddi aktivlər, materiallar, azqiymətli və
tezköhnələn əşyalar, uzunmüddətli maliyyə qoyuluşları, kapital qoyuluşları,
əmək haqqı üzrə hesablaşmalar, istehsal məsrəfləri, məhsul istehsalı və satışı,
hesablaşmalar, mənfəət və zərərlər və s. mühasibat uçotunun obyektləri hesab
olunur.
Təsərrüfat əməliyyatları zamanı, müəssisə:
1) materiallar, əsas vəsaitlər, qeyri-maddi aktivlər alır, 2) onlardan istifadə
edir, 3) istehsal prosesinə xərc çəkir, 4) hazır məhsul istehsal edir, 5) onu
satır, 6) satışdan pul vəsaiti və mənfəət əldə edir. Bütün bünlar təsərrüfat prosesləri zamanı baş verir.
Mühasibat uçotunun predmetini aydınlaşdırarkən onun tarixi inkişafına
də nəzər yetirmək lazımdır. Belə ki, mühasibat uçotunun predmetinin məzmunu
müxtəlif iqtisadi-ictimai formasiyalarda müxtəlif olmuşdur.
Ibtidai icma quruluşunda uçotun ən sadə forması tətbiq edilirdi.
Burada uçotun predmeti icmanın mülkiyyətini təşkil edən vəsait və onun
istifadəsi üzrə baş verən əməliyyatlar hesab olunurdur.
Quldarlıq quruluşunda istehsal üzərində tam hakimiyyət hökm sürmüş və
burada qullar da uçotun predmetini təşkil etmişdir.
Feodalizm cəmiyyətində istehsal vasitələri və əmək əşyaları üzərində
tam, kəndlilər üzərində isə natamam hakimiyyət mövcud idi. Kəndlilər alqı-satqı
obyektlri olduğuna görə də uçotun obyektlərinə daxil edilirdi.
Kapitalizm cəmiyyətində mühasibat uçotunun predmeti fərdi kapitalın
dövranı hesab olunurdu.
Sosializm cəmiyyətində mühasibat uçotunun predmeti müəssisələrin,
təşkilatların sərəncamında olan vəsaitlərin istifadəsini və onların vəziyyətini
əks etdirirdi.
Qeyd edilənlərdən belə nəticəyə gəlmək olar kı uçotun predmetini hər
bir ictimai formasiyanın xarakteri müəyyən edir.
- Təsərrüfat vəsaitlərinin və onların əmələ gəlmə mənbələrinin təsnifatı
Bazar iqtisadiyyatı şəraitində təsərrüfatın bütün işinə operativ
rəhbərlik etmək üçün mühasibat uçotunun böyük əhəmiyyəti vardır. Mühasibat
uçotunun tətbiq edildiyi əsas sahə müəssisə sayılır.
Mühasibat uçotunun predmeti haqqında tam anlayışı əldə etmək üçün
onun tərkib hissələrinin nədən ibarət olmasını öyrənmək lazımdır.
Müəssisədə
mövcud olan vəsaitlər mühasibat uçotunda iki cür qruplaşdırılır:
I.
vəsaitin tərkibi və yerləşməsinə görə;
II.
vəsaitlərin əmələ gəlmə mənbələri və məqsədli təyinatına görə.
Müəssisə vəsaiti, tərkibi və yerləşməsinə (I) görə 4 qrupa bölünür:
1.
Istehsal sferasında olan vəsaitlər;
2.
Tədavül serasında olan vəsaitlər;
3.
Mənzil, mədəni-məişət təyinatlı vəsaitlər;
4.
Yayındırılmış vəsaitlər
Istehsal sferasında olan vəsaitəlr istehsal prosesində oynadığı roldan asılı olaraq əmək
vəsaitlərinə və əmək əşyalarına bölünür. Əmək
vəsaitləri istehsal prosesində uzun müddət xidmət edir. Əmək əşyaları istehsal prosesində bir
dəfə iştirak edir və öz dəyərini tamamilə istehsal olunmuş məhsulun üzərinə
keçirir.
Əsas vəsaitlər istehsal sferasında 1 ildən çox
iştirak edən, hər vahidinin dəyəri 500 min manatdan çox olan, köhnəldikcə öz
dəyərini müəyyən olunmuş normalarla hissə-hissə məhsulun (xidmətin) dəyərinə
keçirən və bu zaman öz natural formasını dəyişməyən vəsaitlər deyilir. Əsas
vəsaitlərə binalar, qurğular, maşın və avadanlıqlar, nəqliyyat vasitələri, öz
mülkiyyətində olan torpaq sahələri və s aiddir.
Qeyri-maddi aktivlər fiziki xassəyə malik olmayan,
müəssisənin təsərrüfat fəaliyyətində uzun müddət istifadə olunan və gəlir
gətirən vəsaitlərə deyilir. Qeyri-maddi aktivlərə torpaq sahələrindən, təbii
ehtiyatlardan istifadə hüquqları, lisenziyalar, nou-hau, proqramm məhsulları,
təşkilati xərclər, əmtəə nişanları, ticarət markaları və s. aiddir. Qeyri-maddi
aktivlərin dəyəri xüsusi köhnəlmə normalarına əsasən məhsulun maya dəyərinə və
ya tədavül xərclərinə daxil edilir.
Istehsal və yaxud tədavül prosesində bir dəfə iştirak edən və
öz dəyərini bütünlükdə hazır məhsulun üzərinə keçirən, yaxud mal formasından
pul formasına keçən vəsaitlərə dövriyyə vəsaitləri deyilir. Dövriyyə
vəsaitlərinə xammal, material, mal ehtiyatları, kassadakı, hesablaşma və
valyuta hesablarındakı pul vəsaitləri, qiymətli kağızlar, hazır məhsul, debitor
borcları və s. aiddir.
Tədavül sferasında olan vəsaitlərə pul vəsaiti və
hesablaşmalarda olan vəsaitlər aiddir. Hesablaşmalarda olan vəsaitə başqa
müəssisə və idarələrin həmin müəssisəyə olan borcu misal ola bilər. Buna
debitor borcları, təhtəl hesab məbləğlər, malalanların borcu Aid ola bilər.
Tədavül
sferasında olan vəsaitlərə eyni zamanda satılmaq üçün müəyyən edilmiş və
yüklənib göndərilmiş məhsullar da daxil edilir (anbarda olan hazır məhsullar və
yüklənən məhsullar).
Pul
vəsaitlərinin vasitəsi ilə müəssisə öz işçi heyətinə əmək haqqı verir, satdığı
mallar üçün ölkə daxilindəki və xarici malsatanlarla hesablaşma aparır, büdcəyə
müxtəlif vergilər və tədiyyələr ödəyir, ehtiyacı olan müəssisələrə borc verir.
Müəssisələr öz pul vəsaitlərinin əsas hissəsini bankdakı hesablaşma hesabında
və valyuta hesabında saxlayır.
Satılmış
məhsullar və mallar üçün malalanların müəssisəyə olan borcu hesablaşmalara
aiddir.
Mənzil, mədəni-məişət təyinatlı vəsaitlərə mənzil, mədəni-məişət və
səhiyyə təyinatlı vəsaitlər aiddir. Onlara yaşayış binaları, uşaq bağçaları və
evləri, klub binaları, onların inventar və avadanlıqları aiddir.
Yayındırılmış vəsaitlərə müəssisəyə Aid olan,
lakin onun dövriyyəsində iştirak etməyən vəsaitlər aiddir. Bu cür vəsaitlərə
mənfəttdən büdcəyə ödəniləsi vergi, təsərrüfat fəaliyyəti nəticəsində əldə
olunan zərərlər və s. Aid ola bilər.
Müəssisənin
vəsaitləri tərkibinə və yerləşməsinə görə sxematik şəkildə aşağıdakı kimi
təsnifləşdirilə bilər.
Vəsaitlərin əmələ gəlmə mənbələri (II)
aşağıdakılardır:
1.
xüsusi vəsaitlər;
2.
cəlb edilmiş vəsaitlər
Xüsusi vəsaitlərə müəssisənin fəaliyyət göstərdiyi
bütün dövr üçün ona təhkim olunmuş vəsaitlər
və təsərrüfat fəaliyyəti nəticəsində əldə edilən mənfəət aiddir. Buraya
nizamnamə kapitalı (fondu), əlavə kapital, ehtiyat kapitalı, əsas vəsaitlərin
köhnəlməsi, mənfəət misal ola bilər.
Xüsusi
vəsaitlərə – müəssisənin əmək ödəməsi üzrə işçi heyətinə olan borcu, əmək
ödəməsinə müvafiq olaraq sosial təminat orqanlarına hesablanmış lakin
ödənilməmiş borclar, məzuniyyət haqqı vermək üçün yaradılan ehtiyatlar aiddir.
Nizamnamə
kapitalı müəssisə təşkil edildiyi vaxt yaradılır, yəni ona ayrılan vəsaitin
pula ifadəsi nizamnamə kapitalının məbləğini əks etdirir.
Əsas vəsaitlərin
köhnəlmə məbləği xidmət etmə dövrü ərzində əsas vəsaitlərin öz dəyərinin hazır
məhsulun üzərinə keçirildiyini və həmin hissənin pulla ifadəsini göstərir.
Cəlb edilmiş vəsaitlərə müəssisəyə müvəqqəti istifadə üçün
verilən vəsaitlər aiddir. Həmin
vəsaitlər müəyyən edilmiş vaxtda geri qaytarılmalıdır. Bu vəsaitlərə ayrı-ayrı
müəssisələr olan borc, bank kreditləri, kreditor borcları və s. aiddir.
Qısa müddətli
kreditlər müəssisə vəsaitlərinin əsas əmələ gəlmə mənbələri kimi müvəqqəti
ehtiyac üçün baqklar tərəfindən verilir. Bu kreditlər mal, material almaq,
yoldakı hesablaşma sənədlərinin dəyərini ödəmək üçün verilir.
Müəssisə
malsatanlardan mal (material) aldıqda adətən onun dəyərini vaxtında ödəyə
bilmir. Malın daxil olması ilə onun dəyərinin ödənilməsi arasında müəyyən vaxt
keçi rvə müəssisənin malsatanlara borcu əmələ gəlir. Bu borc müəssisənin
vəsaitinin müvəqqəti əmələ gəlmə mənbəi hesab olunur.
Veksellər
dedikdə müəyyən edilmiş formada yazılı şəkildə ciddi borc öhdəçiliyi başa
düşülür.
Bankdan alınan
kreditlərdən başqa müəssisə bahqa müəssisələrdən qısa, uzunmüddətli borclar
alır. Həmin borclar qiymətli kağızlar, müəssisənin əmək kollektivinin
səhmlərinin və istiqrazlarının buraxılmaına istifadə olunur.
Mənfəət
müəssisənin təsərrüfat fəaliyyətinin maliyyə nəticəsi hesab ounur. Mənfəət
müəssisənin təsis sənədlərində göstərilən qaydada istifadə olunur. Onun bir
hissəsi dövlət büdcəsinə verilir, digər hissəsi isə müəssisənin geniş təkrar
istehsalının ehtiyacı üçün xüsusi təyinatlı fondlara, başqa bir hissəsi ehtiyat
fonduna və əlavə kapitala ayrılır, dividend qaydasında müəssisənin öz
işçilərinə və kənar təsisçilərə verilir.
Xüsusi
təyinatlı fondlar müəssisənin sərəncamında qalan mənfəət və yaxud qabağcadan
müəyyən edilmiş məqsədlərə istifadə etmək üçün təsisçilərin fondu və əvəzsiz
paylar hesabına ayrılır.
Ehtiyat kapitalı müəssisənin əsas kapitalını
tamamlamaq, təsisçilərə dividend vermək və yaxud gələcəkdə baş verə biləcək
zərərləri örtə bilmək üçün mənfəət hesabına yaradılır. Ehtiyat kapitalı eyni
zamanda işçi heyətinə məzuniyyət haqqı, əsas vəsaitlərin təmirini aparmaq üçün
yaradılır. Yuxarıda izah olunanlara əsasən əmələ gəlmə mənbələrinə və məqsədli
təyinatına görə müəssisə vəsaitlərini aşağıdakı kimi təsnifləşdirmək olar
No comments:
Post a Comment